نگران وزیراعظم کے نام پر اتفاق ؟؟

ملک میں عام انتخابات سے قبل نگراں وزیر اعظم کے نام پر کئی دنوں تک غور و خوض کے بعد سینیٹر انوار الحق کاکڑ جو بلوچستان عوامی پارٹی (BAP) سے وابستہ قانون ساز ہیں – کو یہ عہدہ سنبھالنے کے لیے حتمی شکل دے دی گئی ہے۔

 یہ پیش رفت اسلام آباد میں مشاورت کے آخری دور میں وزیراعظم شہباز شریف اور اپوزیشن لیڈر راجہ ریاض کے درمیان ہونے والی ملاقات کے بعد سامنے آئی۔

 وزیراعظم آفس کی جانب سے جاری بیان کے مطابق وزیراعظم شہباز شریف اور راجہ ریاض کے درمیان حتمی مشاورت کا عمل کامیابی سے مکمل ہوگیا۔

 وزیراعظم آفس کے مطابق وزیراعظم اور اپوزیشن لیڈر نے مشترکہ طور پر دستخط کرکے صدر پاکستان ڈاکٹر عارف علوی کو ایڈوائس بھیج دی ہے۔

 صدر نے آرٹیکل 224 اے کے تحت سمری کی منظوری دی ہے۔

 ملاقات کے بعد میڈیا سے بات کرتے ہوئے راجہ ریاض نے کہا: "ہم نے فیصلہ کیا کہ عبوری وزیر اعظم چھوٹے صوبے سے ہو گا"۔

 انہوں نے کہا کہ انوار الحق کاکڑ کا نام انہوں نے تجویز کیا تھا جسے منظور کر لیا گیا۔

 ایک روز قبل صدر مملکت ڈاکٹر عارف علوی نے وزیر اعظم کو ایک خط لکھا تھا، جس میں انہیں اور اپوزیشن لیڈر کو یاد دلایا گیا تھا کہ وہ 12 اگست (ہفتہ) تک عبوری وزیر اعظم کے لیے "مناسب شخص" تجویز کریں۔

 وزیر اعظم شہباز شریف اور راجہ ریاض دونوں کو لکھے گئے خط میں صدر نے انہیں بتایا کہ آرٹیکل 224 اے کے تحت انہیں قومی اسمبلی کی تحلیل کے تین دن کے اندر عبوری وزیر اعظم کے لیے نام تجویز کرنا ہے۔

 "جیسا کہ پاکستان کے آئین کے آرٹیکل 224 (1A) میں دیا گیا ہے، وزیر اعظم اور سبکدوش ہونے والی قومی اسمبلی میں قائد حزب اختلاف 12 اگست کے بعد نگراں وزیر اعظم کی تقرری کے لیے موزوں شخص کی تجویز دے سکتے ہیں"۔  

 

 سینیٹر انوار الحق کاکڑ جنہیں پاکستان کا نیا نگراں وزیراعظم نامزد کیا گیا ہے، بلوچستان سے تعلق رکھنے والی سیاسی شخصیت ہیں۔

 انوار الحق کاکڑ 2018 میں سینیٹ کے لیے منتخب ہوئے تھے اور وہ بلوچستان سے بہت سرگرم سیاست دان رہے ہیں۔  وہ ایوان بالا کے لیے منتخب ہونے سے قبل صوبائی حکومت کے ترجمان کے طور پر بھی کام کر چکے ہیں۔

 2008 میں انوار الحق کاکڑ نے ق لیگ کے ٹکٹ پر کوئٹہ سے قومی اسمبلی کا الیکشن لڑا۔

 انہوں نے بلوچستان یونیورسٹی سے پولیٹیکل سائنس، سوشیالوجی میں ماسٹرز کی ڈگری حاصل کی۔